யாழ்ப்பாணம் வடமராட்சி மருதங்கேணியில் நீண்ட காலமாக இடம்பெறும் சட்டவிரோத மணல் அகழ்வினை கட்டுப்படுத்துவதற்கு நாகர்கோவில் பகுதியில் பொலிஸ் காவலரண் அமைக்குமாறு கோரிக்கை விடுக்கப்பட்ட போதிலும் இன்று வரை குறித்த பகுதியில் பொலிஸ் காவலரண் அமைக்கப்படவில்லை என குற்றம் சாட்டப்பட்டுள்ளது.
யாழ்ப்பாண மாவட்ட ஒருங்கிணைப்பு குழுக் கூட்டம் இன்றைய தினம் இடம்பெற்ற போதே மருதங்கேணி பிரதேச செயலாளர் இதனைத் தெரிவித்துள்ளார்.
மருதங்கேணி பிரதேச செயலர் பிரிவுக்குட்பட்ட குடத்தனை நாகர்கோயில், மணற்காடு பகுதிகளில் நீண்ட காலமாக சட்டவிரோதமான மணல் அகழ்வு இடம் பெற்று வரும் நிலையில், குடத்தனை மற்றும் நாகர்கோவில் பகுதிகளில் பொலிஸ் காவலரண் அமைக்குமாறு கோரிக்கை விடுக்கப்பட்ட போதிலும் இதுவரை குறித்த கோரிக்கைக்கு அமைவாக பொலிசார் செயற்படவில்லை என குற்றஞ்சாட்டப்பட்டது.
குறித்த விடயம் தொடர்பில் கூட்டத்தில் கருத்து தெரிவித்த அப்பகுதியை சேர்ந்த பொதுமகன், இரவு பகலாக தொடர்ச்சியாக மணல் அகழ்வு இடம்பெற்று வருகின்றது.
கூட்டங்களில் மாத்திரம் இந்த விடயம் பேசப்படுகின்றதே தவிர எந்த விதமான ஆக்கபூர்வமான நடவடிக்கையும் எடுக்கப்படவில்லை என விசனம் தெரிவித்தார்.
