யாழ். பல்கலைக்கழக கலைப் பீடாதிபதி பேராசிரியர் சி. ரகுராம் மீண்டும் இன்று பதவி ஏற்கவுள்ளதாக தகவல் வெளியாகியுள்ளது.
வகுப்பு நீக்கம் செய்யப்பட்ட சில மாணவர்கள் மீதான தடையை நீக்குவதற்கு யாழ் பல்கலைக்கழக பேரவைக் கூட்டத்தினால் எடுக்கப்பட்ட தீர்மானத்தின் பின்னர், பல்கலைக்கழகத்தின் கலைப் பீடாதிபதி பேராசிரியர் ரகுராம் தனது பதவியிலிருந்து விலகுவதாக அறிவித்திருந்தார்.
பதவி விலகிய கலைப்பீட பீடாதிபதி பேராசிரியர் எஸ்.ரகுராமிற்கு ஆதரவாக யாழ் பல்கலைக்கழக விரிவுரையாளர்கள் சங்கம் வேலைநிறுத்தப் போராட்டத்தை அறிவித்து ஆதரவு தெரிவித்திருந்தமை குறிப்பிடத்தக்கது.
இந்நிலையில், பீடாதிபதியின் பதவி விலகல் குறித்துக் கலந்துரையாடும் வகையில் யாழ்ப்பாணப் பல்கலைக்கழக பேரவையின் விசேட பொதுக்குழுக் கூட்டம் நேற்று (29) இடம்பெற்றது.
அவருடைய பதவி விலகல் கடிதத்தை உபவேந்தர் எஸ்.சிறீஸ்கந்தராஜா ஏற்காத நிலையில், பல்கலைக்கழக பேரவையின் தீர்மானத்துக்கு அமைவாக கலைப்பீடாதிபதியாக அவர் தொடரவுள்ளார்.
எனவே பேராசிரியர் ரகுராம் மீண்டும் இன்று பதவியேற்கவுள்ளதாக தீர்மானம் மேற்கொள்ளப்பட்டுள்ளது.
