அறுகம் வளைகுடா சுற்றுலா அபிவிருத்தி திட்டம் தொடர்பில் கலந்துரையாடுவதற்காக ஜனாதிபதி செயலகத்தில் கூட்டப்பட்ட சந்திப்பின் போது, தேசிய பாதுகாப்பு தொடர்பான ஜனாதிபதியின் சிரேஷ்ட ஆலோசகரும், ஜனாதிபதி செயலகத்தின் பிரதானியுமான சாகல ரத்நாயக்கவினால், அறுகம் குடாவிற்கான பிரதான சுற்றுலா திட்டம் முன்வைக்கப்பட்டது.
அறுகம் வளைகுடா சுற்றுலா அபிவிருத்தித் திட்டம், இலங்கையின் சுற்றுலாத் துறைக்கு கணிசமான பங்களிப்பை வழங்கும் ஆற்றலைக் கொண்டுள்ளது என ஜனாதிபதி ஊடகப் பிரிவு தெரிவித்துள்ளது.
இக்கலந்துரையாடலின் போது ஜனாதிபதி ரணில் விக்கிரமசிங்க தலைமையில் ஆரம்பமான சந்திப்பில் இனங்காணப்பட்ட விடயங்கள் மற்றும் அவற்றை நிவர்த்தி செய்வதற்கு எடுக்கப்பட்ட நடவடிக்கைகள் குறித்து விரிவாக ஆராயப்பட்டன.
பிரதேசத்தின் உட்கட்டமைப்பு அபிவிருத்தி தொடர்பான சவால்கள் மற்றும் சுற்றுலாத் துறையின் வளர்ச்சிக்குத் தடையாக உள்ள விடயங்கள் குறித்தும் கவனம் செலுத்தப்பட்டதுடன் பல்வேறு நிறுவனங்களின் பங்கேற்பாளர்களும் ஒவ்வொரு நிறுவனமும் இந்த சவால்களுக்கு தீர்வு காண்பதில் எவ்வாறு பங்களிக்க முடியும் என்பதையும் விவாதித்தனர்.
இக்கலந்துரையாடலின் போது, நகர அபிவிருத்தி அதிகார சபையினால் தயாரிக்கப்பட்ட அறுகம் குடாவுக்கான பிரதான சுற்றுலாத் திட்டத்தை சாகல ரத்நாயக்க சமர்ப்பித்தார்.
ரத்னாயக்க தலைமையில் குறித்த சந்திப்பு இடம்பெற்றதுடன், இந்த முயற்சிகளின் முன்னேற்றத்தை மதிப்பிடுவதற்கு ஒரு மாதத்தில் தொடர் கூட்டமொன்று நடத்தப்படும் எனவும் இணக்கம் காணப்பட்டது.
