2023ஆம் ஆண்டு சிங்கள மற்றும் தமிழ்ப் புத்தாண்டை முன்னிட்டு சிறைக்கைதிகள் மூன்று நாட்களிலும் பார்வையாளர்களை சந்திப்பதற்கு விசேட சந்தர்ப்பத்தை சிறைச்சாலைகள் திணைக்களம் தயாரித்துள்ளதாக மேலதிக சிறைச்சாலைகள் ஆணையாளர் நாயகமும் சிறைச்சாலைகளின் பேச்சாளருமான சந்தன ஏக்கநாயக்க இன்று தெரிவித்தார்.
இன்று 13 ஆம் திகதி முதல் மூன்று நாள் அவகாசம் வழங்கப்பட்டுள்ளதாக அவர் இதன்போது தெரிவித்தார்.
இந்த நாட்களில் கைதிகளை சந்திக்க வரும் உறவினர்களுக்கு ஒருவருக்கு சமமான உணவுப் பொட்டலமும், ஒருவருக்குத் தேவையான அளவு இனிப்புகளும் வழங்க வாய்ப்பு வழங்கப்படும். அனைத்து சிறை அமைப்புகளும் இதற்குத் தேவையான வசதிகளை செய்து கொடுத்துள்ளன.
மேலும், அனைத்து சிறைச்சாலைகளிலும் கைதிகள் மற்றும் சந்தேக நபர்களுக்கு புத்தாண்டுச் சடங்குகளைச் செய்யவும் வாய்ப்புகள் வழங்கப்பட உள்ளன. சிறைக்கைதிகள் அனைவருக்கும் பால் மற்றும் அரிசி வழங்குவதற்கான ஏற்பாடுகளை சிறைச்சாலைத் திணைக்களம் செய்துள்ளது.
மேலும், கைதிகளுக்கு எண்ணெய் தேய்த்தலும் சம்பிரதாய பூர்வமாக நடைபெற உள்ளது.
கைதிகளின் மனநிலையை மேம்படுத்தும் வகையில் இந்தத் திட்டம் அறிமுகப்படுத்தப்பட்டுள்ளது.
சிறைச்சாலைகள் மறுவாழ்வுத் திணைக்களமும் இசை நிகழ்ச்சிகள், சுகாதாரப் பொருட்கள் விநியோகம் மற்றும் பாரம்பரிய விளையாட்டுக்கள் போன்ற பல புத்தாண்டு நிகழ்வுகளை ஏற்பாடு செய்துள்ளதுடன் கைதிகள் நலன்புரிச் சங்கத்தின் உபகுழுக்களின் ஆதரவையும் அது பெற்றுள்ளதாகவும் தெரிவிக்கப்படுகிறது.
T02
