இந்தியாவின் ஐ.பி.எல். கிரிக்கெட் போட்டி ஐக்கிய அரபு அமீரகத்தில் இன்று ஆரம்பமாகின்ற நிலையில், முதல் போட்டியில், சென்னை மற்றும் மும்பை அணிகள் மோதுகின்றன.
13 ஆவது ஐ.பி.எல். கிரிக்கெட் போட்டி ஐக்கிய அரபு அமீரகத்தில் இன்று ஆரம்பமாகி நவம்பர் மாதம் 10 ஆம் திகதி வரை இடம்பெறவுள்ளது.
ஐக்கிய அரபு அமீரகத்தில் டுபாய், அபுதாபி, சார்ஜா ஆகிய நகரங்களில் இடம்பெறும் இந்த 20 ஓவர் கிரிக்கெட் திருவிழாவில் மூன்று முறை சாம்பியனான சென்னை சூப்பர் கிங்ஸ், மும்பை இந்தியன்ஸ், பெங்களூரு ரோயல் சேலஞ்சர்ஸ், ஐதராபாத் சன்ரைசர்ஸ், கொல்கத்தா நைட் ரைடர்ஸ், ராஜஸ்தான் ரோயல்ஸ், கிங்ஸ் லெவன் பஞ்சாப், டெல்லி கேப்பிட்டல்ஸ் ஆகிய 8 அணிகள் பங்கேற்கின்றன.
ஒவ்வொரு அணியும் ஏனைய அணிகளுடன் தலா 2 முறை மோத வேண்டும். லீக் சுற்று முடிவில் முதல் 4 இடங்களை பிடிக்கும் அணிகள் இறுதிப்போட்டிக்கு முந்தைய ‘பிளே-ஆப்’ சுற்றுக்கு தகுதி பெறும். கொரோனா தடுப்பு மருத்துவ பாதுகாப்பு நடைமுறைகளை பின்பற்றி இடம்பெறவுள்ள இந்த போட்டிக்கு ரசிகர்களுக்கு அனுமதி கிடையாது.
அபிதாபியில் இன்று (சனிக்கிழமை) இடம்பெறும் தொடக்க ஆட்டத்தில் டோனி தலைமையிலான சென்னை சூப்பர் கிங்ஸ் அணி, நடப்பு சாம்பியன் ரோகித் சர்மா தலைமையிலான மும்பை இந்தியன்ஸுடன் மோதுகின்றது.
ஆரம்ப ஆட்டக்காரர்கள் ஷேன் வொட்சனும், பாப் டு பிளிஸ்சிஸ்ஸும் நல்ல ஆரம்பம் அமைத்துக்கொடுத்தால் சவாலான ஓட்ட எண்ணிக்கையை எட்ட முடியும்.
ரெய்னா ஆடும் 3 ஆவது துடுப்பாட்ட வரிசைக்கு அம்பத்தி ராயுடுவை பயன்படுத்துவார்கள் என்று தெரிகிறது. அங்குள்ள ஆடுகளங்களில் சுழற்பந்து வீச்சு தாக்கத்தை ஏற்படுத்தும் என்று கணிக்கப்பட்டிருப்பதால் ஜடேஜா, இம்ரான் தாஹிர், பியுஷ் சாவ்லா ஆகியோரின் பந்துவீச்சு முக்கிய பங்கு வகிக்கும்.
4 முறை சாம்பியனான மும்பை இந்தியன்ஸ் அணியில் இறுதி நேரத்தில் ‘யோர்க்கர் மன்னன்’ மலிங்க விலகியது பாதிப்பை ஏற்படுத்தினாலும் சாதுர்யமாக பந்து வீசக்கூடிய பும்ரா, டிரென்ட் பவுல்ட், பேட்டின்சன் உள்ளிட்டோர் பந்து வீச்சில் அணியை தூக்கி நிறுத்தி விடுவார்கள்.
மும்பை அணியின் அசுர பலமே, அவர்களின் துடுப்பாட்டம் தான். அணித்தலைவர் ரோகித் சர்மாவும், குயின்டான் டி கொக்கும் கடந்த சீசனில் அமர்க்களப்படுத்தினர். இந்த ஆண்டும் அவர்கள் தான் ஆரம்ப துடுப்பாட்ட வீரர்களாக அடியெடுத்து வைக்கிறார்கள்.
ஹர்திக் பாண்ட்யா, பொல்லார்ட், சூர்யகுமார் யாதவ் அதிரடியில் மிரட்டுவார்கள். இப்படி எல்லா வகையிலும் மும்பை அணி வலுமிக்கதாக திகழ்வதால் சென்னை அணிக்கு கடும் சவால் காத்திருக்கிறது என்பதில் சந்தேகமில்லை.
கடந்த ஆண்டு மும்பையுடன் மோதிய 4 போட்டிகளிலும் சென்னை அணி தோல்வியையே தழுவியது. இறுதி ஆட்டத்தில் ஒரு ஓட்ட வித்தியாசத்தில் கிண்ணத்தை இழந்ததும் அடங்கும்.
கடந்த சீசனில் அடைந்த தோல்விகளுக்கு இந்த ஆண்டு வட்டியும், முதலுமாக முதல் ஆட்டத்திலேயே சென்னை அணி பதிலடி கொடுக்குமா ? என்பதே ரசிகர்களின் எதிர்பார்ப்பாகும்.
போட்டிக்கான இரு அணிகளின் உத்தேச பட்டியல் வருமாறு:-
சென்னை : ஷேன் வொட்சன், பாப் டு பிளிஸ்சிஸ், அம்பத்தி ராயுடு, டோனி (தலைவர்), கேதர் ஜாதவ், ரவீந்திர ஜடேஜா, வெய்ன் பிராவோ, மிட்செல் சான்ட்னெர் அல்லது இம்ரான் தாஹிர், தீபக் சாஹர், பியுஷ் சாவ்லா, ஷர்துல் தாகூர்.
மும்பை: ரோகித் சர்மா (தலைவர்), குயின்டான் டி கொக், சூர்யகுமார் யாதவ், இஷான் கிஷன், குருணல் பாண்ட்யா, பொல்லார்ட், ஹர்திக் பாண்ட்யா, ராகுல் சாஹர், மெக்லெனஹான் அல்லது பேட்டின்சன் அல்லது நாதன் கவுல்டர்-நிலே, டிரென்ட் பவுல்ட், ஜஸ்பிரித் பும்ரா.
இன்றை போட்டி இந்திய நேரப்படி இரவு 7.30 மணிக்கு ஆரம்பமாகவுள்ளமை குறிப்பிடத்தக்கது.
