சர்ச்சையை ஏற்படுத்திய 323 கொள்கலன்களில் எந்த ஆயுதங்களும் இல்லை என்று கூறிய கூடுதல் சுங்க இயக்குநர் ஜெனரலை உடனடியாக கைது செய்யுமாறு முன்னாள் நாடாளுமன்ற உறுப்பினர் உதய கம்மன்பில நேற்று (09) பொலிஸாரிடம் கோரிக்கை விடுத்தார்.
கொள்கலன்கள் விடுவிக்கப்பட்ட சம்பவம் தொடர்பாக நேற்று குற்றப் புலனாய்வுத் துறையிடம் வாக்குமூலம் அளித்த பின்னர் ஊடகங்களுக்குக் கருத்து தெரிவிக்கும் போதே அவர் இதனைத் தெரிவித்தார்.
இது குறித்து அவர் மேலும் தெரிவிக்கையில்,
இந்தக் கொள்கலன்களை விடுவிக்க முடிவு செய்த குழுவின் தலைவரான அவர், நவம்பரில் ஓய்வு பெற்ற பிறகு பெல்ஜியம் செல்ல திட்டமிட்டிருந்ததாக முறைப்பாடு செய்துள்ளார்.
முன்னாள் மத்திய வங்கி ஆளுநர் அர்ஜுன மகேந்திரன் வெளிநாடு சென்றதால் மத்திய வங்கி பிணைமுறி மோசடி விசாரணை பாதிக்கப்பட்டது போல, தாம் வெளிநாடு சென்றால் இந்த விசாரணையும் பாதிக்கப்பட வாய்ப்புள்ளது என்றும் அவர் சுட்டிக்காட்டியுள்ளார்
எனவே, வெளிநாடு செல்வதை உடனடியாகத் தடுக்கும் நீதிமன்ற உத்தரவைப் பெறுமாறு முன்னாள் நாடாளுமன்ற உறுப்பினர் நேற்று (09 ) பொலிஸாரிடம் எழுத்துப்பூர்வ கோரிக்கை விடுத்திருந்தமை குறிப்பிடத்தக்கது.
