சிவப்பு அறிவிப்பு விடுக்கப்பட்ட வெளிநாடுகளில் மறைந்திருக்கும் பாதாள உலக நபர்கள் பதினைந்து பேரை இலங்கைக்கு அழைத்து வருவதற்கான நடவடிக்கைகள் எடுக்கப்பட்டு வருவதாக பொது பாதுகாப்பு அமைச்சர் ஆனந்த விஜேபால தெரிவித்துள்ளார்.
நேற்றைய (11) நாடாளுமன்ற அமர்வின் போதே அவர் இவ்வாறு தெரிவித்துள்ளார்.
இது தொடர்பாக அவர் மேலும் தெரிவிக்கையில்,
இந்த ஆண்டு ஜனவரி 01ஆம் திகதி முதல் இன்று வரை, வெளிநாடுகளில் மறைந்திருந்த 11 ஒழுங்கமைக்கப்பட்ட குற்றவாளிகள் கைது செய்யப்பட்டு நாட்டிற்கு அழைத்து வரப்பட்டுள்ளனர்.
இந்த ஆண்டு ஜனவரி முதல் செப்டம்பர் 10ஆம் திகதி வரை மொத்தம் 105 ஒழுங்கமைக்கப்பட்ட குற்றங்கள் பதிவாகியுள்ளதாகவும், அந்த சம்பவங்கள் தொடர்பாக மொத்தம் 322 சந்தேக நபர்கள் கைது செய்யப்பட்டுள்ளதாகவும் அமைச்சர் தெரிவித்துள்ளார்.
கைது செய்யப்பட்டவர்களில் 33 துப்பாக்கிச் சூடு நடத்தியவர்கள், 24 மோட்டார் சைக்கிள் ஓட்டுநர்கள் மற்றும் உதவியதாக குற்றம் சாட்டப்பட்ட 265 சந்தேக நபர்கள் அடங்குவர்.
ஜனவரி முதல் இன்றுவரை மொத்தம் 1,698 துப்பாக்கிகள் பறிமுதல் செய்யப்பட்டுள்ளன. அவற்றில் 58 டி-56 துப்பாக்கிகள், 61 கைத்துப்பாக்கிகள், 40 ரிவால்வர்கள், 169 12-போர் துப்பாக்கிகள், 33 வீட்டில் தயாரிக்கப்பட்ட ‘கல்கடாஸ்’ கைத்துப்பாக்கிகள், ஆறு ரிப்பீட்டர்கள் அடங்கும் என்று அவர் சுட்டிக்காட்டியுள்ளார்.
இலங்கையின் திட்டமிட்ட குற்றவாளிகள் சட்டத்தின் பிடியிலிருந்து தப்பிக்க ஐக்கிய அரபு எமிரேட்ஸ், இத்தாலி, பிரான்ஸ், சுவிட்சர்லாந்து, இந்தோனேசியா, கனடா, ரஷ்யா, ஓமான் மற்றும் இந்தியா போன்ற நாடுகளில் பதுங்கியிருப்பதாக தகவல்கள் தெரிவிக்கின்றன.
தற்போது ரஷ்யா, ஓமன், துபாய் மற்றும் இந்தியாவில் 15 பேர் சிவப்பு அறிவிப்பு விடுக்கப்பட்டு, வெளிநாடுகளில் மறைந்திருக்கும் பெரிய குற்றவாளிகள் மற்றும் போதைப்பொருள் கடத்தல்காரர்கள் என அடையாளம் காணப்பட்டுள்ளனர்.
அவர்களை மீண்டும் இலங்கைக்கு அழைத்து வருவதற்கான நடவடிக்கைகள் முன்னெடுக்கப்பட்டு வருவதாகவும் அமைச்சர் மேலும் தெரிவித்திருந்தமை குறிப்பிடத்தக்கது.
